giza eskubideen zine jaialdia
Askok uste dutenaren kontra, zinemaldi honetan proiektatzen diren filmak ez dira soilik salaketa erraz eta sentimendu ¨oenegeroz¨ gainezka egiten duten filmak. Fikzioa, dokumentalak, iraupen laburreko filmak, animazioak,... molde ugariko film interesgarri apirilaren 8tik 15era.
gatazka sukaldea
Izen hori eman diote AEBtako Pittburgh hirian ireki duten ¨takeaway¨ jatetxe ausartari. Bere menuaren berezitasuna: AEB-ekin gatazkan dauden herrialdeen janariak soilik eskaintzea. Gastronomia afganistarra, ipar korearra, venezolarra, iraniarra,... bertara joateko aukerarik ez baduzu bisitatu ezazu behintzat euren webgune interesgarria.
break on stage
Bilbon ospatuko da apirilaren bederatzigarrenean La Casillan. Munduko break dance talderik onenak (munduko txapeldun diren Jinjo Crew hegokorearrak beste batzuen artean) bilduko dituen jaialdiak honez gero ez du aurkezpenik behar. Burua galduko duzu!
leioako umore azoka
Beste klasiko bat. Herri bizkaitarreko antzokiak eta kaleak antzerki eta irribarrez betetzen dituen jaialdia. Bertoko eta kanpoko konpainien lan berri eta berritzaileak ikusteko aukera maiatzaren 12tik 15era.
matchboox
Gisa hontako proiektuak ikusten ditugunean itxaropen guztia galdua ez dagoela sinisten dugu. Poxpolo kaxen formatua baliatuaz, hamaika artisten lanak argitaratzen dituzte. Bilduma guztia nahi genuke gure apaletan, baina ale batzuk agorturik daudenez, sarean gozatzen ditugu. Bai, badakigu...ez horregatik.
parkett aldizkaria
¨Museo txiki bat eta arte garaikide liburutegi handi bat¨. Esaldi honekin definitzen dute euren burua Zurich-en egiten den Parkett aldizkariko arduradunek. 1984. urtetik gaur eguneraino kaleratu dutena eta ekoiztu dutena bildu dute Montehermoson. Maiatzaren 22ra bitarte ikusgai artea erakutsi eta ekoiztu duen proiektua.
ife
Bizitza urbanoaren egunerokotasunaren anestesiaren aurka sortu zen institutu berezi hau. Ingurumen urbanoaren inguruko analisi kritikoa eta hiriko espazioen erabilera ludikoak garatzeko estrategiak garatzen dituIFE-k. Ez duzuela ezer ulertu? Beno, sar zaitezke euren webgunean...
artista berriak
90 urte igaro dira lehendabiziko artista gazteen leihaketa antolatu zenetik. Artista garaikide belaunaldi ezberdinen erakuslehio izan den leihaketa hau, denboraren iraganaren poderioz, arte biltegi izateaz gain gizarte eta historia gordailu ere izan da. Maiatzaren 14 bitarte Koldo mitxelenan ikusgai.
bizikleta safaria
Suediako kaleetan barna ibiltzen ziren bizikletak jarraitzen eta aztertzen hasi ziren. Molde eta adin ezberdinekoak irudietan bildu, eta sailkatu zituzten. Bizikleta fauna migratzailea da ordea eta tarteka migrazio horiei jarraiki europako bazter esberdinetan ere antoalzten dituzte safariak.
beleza malandra ateneoa
Bermeon ireki berri duten Beleza Malandra Ateneoan, kultura eta artearekin zerikusia duten egitasmo ezberdinak antolatzen hasi dira. Hiriburuetik kanpo honelako egitasmoak martxan jartzen direnean poztu egiten gara, eta Bermeoko kasuan, kultura alternatiboan urteak lanean daramatzan jendea dagoela dakigunez jarduera interesgarriak izanen direla badakigu.
malandain ballet
Maiatzak 5 eta 6ann Biarritz-eko balleta etxera itzuli eta Europa osoan dantzatzen ari diren Romeo & Juliette obraren 3 emanaldi eskainiko ditu. Aukera polita, obra klasiko bat ballet garaikidean dantzatua ikusteko.
